طارق عزيز شيخ
طارق عزيز شيخ
طارق عزيز شيخ : اديب ۽ صحافي طارق عزيز شيخ، حيدرآباد جي قديم پاڙي ٽنڊي آغا ۾ 19 ڊسمبر 1971ع تي نامياري صحافي ۽ اديب شيخ عزيز جي گهر ۾ ڄائو. پرائمري تعليم سيٺ حافظ اسڪول ڦليلي مان، ميٽرڪ نور محمد هاءِ اسڪول، انٽر سچل سرمست آرٽس ڪاليج ۽ ايم. اي ڪراچي يونيورسٽي جي سنڌي شعبي مان پاس ڪيائين، جڏهن ته ايم. فل جي ڊگري وفاقي اردو يونيورسٽي ڪراچي جي سنڌي شعبي مان "ممتاز مرزا جي ادبي ۽ ثقافتي خدمتن جو تحقيقي جائزو" جي عنوان سان ڊاڪٽر ڪمال ڄامڙي جي نگراني ۾ حاصل ڪئي. هن لکڻ جي شروعات 1987ع کان ادبي، سياسي، تاريخي ۽ ٻاراڻي ادب جا مضمون ۽ ڪھاڻيون لکڻ سان ڪئي. 1989ع ۾ ‘عوامي آواز’ اخبار ۾ پھرين پروف ريڊر ۽ ڪجهھ عرصي کانپوءِ سب ايڊيٽر طور صحافتي ڪم شروع ڪيو. ان کان پوءِ ثقافت کاتي ۾ پروف ريڊر مقرر ٿيو. ان دوران ئي ڪھاڻين ۽ ڊائريءَ جي ورقن تي مشتمل سندس ڪتاب ‘سرها ساهه پرينءَ جا’ 1994ع ۾ ڇپيو. ساڳئي سال ‘بزنس ايڪسپريس’ اخبار ۾ سب ايڊيٽر طور ڪم ڪيو. آغا سليم جي ادارت هيٺ ‘جاڳو’ اخبار جي ادبي صفحي ‘سرھاڻ’ جو ھڪ سال تائين انچارج رهيو. 1997ع ۾ ‘ڪاوش’ ۾ رپورٽر ۽ اشتھارن جي شعبي سان لاڳاپيل رهيو. 1998ع ۾ ‘سنڌ اخبار’ جي اشتھارن واري شعبي جو انچارج رهيو. 1999ع ۾ ‘بختور’ جو ڪراچيءَ لاءِ بيورو چيف مقرر ٿيو ۽ شاهه لطيف چيئر، ڪراچي يونيورسٽيءَ ۾ ريسرچ آفيسر پڻ مقرر ٿيو، جتي اداري جي تحقيقي جرنل ‘ڪلاچي’ جو سب ايڊيٽر مقرر ٿيو. هن شاهه لطيف چيئر ۾ ‘سنڌي ڪلاسيڪي شاعرن جي لغت’ واري رٿا ۾، شيخ محمد اسماعيل جي نگرانيءَ ۾ ڪم ڪيو. 1999ع ۾ ‘سنڌي ادب جو تنقيدي ۽ تحقيقي جائزو’ جي نالي سان سندس ڪتاب ڇپيو. نائين، ڏهين ۽ ٻارهين درجي ۾ پڙهندڙ شاگردن جي رهنمائيءَ لاءِ ‘مھراڻ جا موتي’ جي نالي سان سندس ٻه جلد 2002ع ۾ شايع ٿيا. 2002ع ۾ هو روزاني‘عوامي آواز’ ۾ اسٽاف رپورٽر ۽ پوءِ ‘سب ايڊيٽر’ مقرر ٿيو. 2004ع ۾ نيوز ميگزين ‘افيئر ’ جو اسسٽنٽ ايڊيٽر ۽ 2006ع ۾ روزاني ‘عوامي فورم’ اخبار جو ايڊيٽر مقرر ٿيو. طارق عزيز شيخ، روزاني ‘جنگ’ اخبار جي ھفتيوار صفحي ‘مھراڻ رنگ’ ۾ 1987ع کان لکڻ جي شروعات ڪئي. ان کانسواءِ روزاني ‘حريت’ اخبار جي سنڌ ايڊيشن ۾ به سندس مضمون شايع ٿيا. طارق عزيز شيخ پرائيويٽ توڙي سرڪاري ادارن لاءِ ماحوليات، معدنيات، نباتات، جابلو سلسلن سميت ڪيترائي سنڌي ۽ اردو ٻولين ۾ دستاويزي اسڪرپٽ پڻ لکيا آهن. هن مختلف اخبارن جا ايڊيٽوريل، سياسي مضمون، تجزيا ۽ موجوده معاملن/ مسئلن تي مضمون پڻ لکيا. صحافتي ڪم دوران سياستدانن، اديبن ۽ مختلف شخصيتن جا انٽرويو پڻ ڪيا اٿس. پبلشر جي حيثيت ۾ 1994ع کان وٺي ‘باک پبليڪيشن’ جي مالڪ طور سنڌي، انگريزي ۽ اردوءَ جا 8 ڪتاب شايع ڪرايا اٿس. 2001ع ۾ سنڌ پبلڪ سروس ڪميشن جو امتحان پاس ڪري تعليم کاتي ۾ پھرين ليڪچرر ۽ 2018ع کان اسسٽنٽ پروفيسر طور پنھنجون ذميواريون انجام ڏئي رهيو آهي. ھن کي سال 2009ع ۾ ڪراچي يونيورسٽي جي سنڌي شعبي پاران منعقد ڪرايل قومي ادبي ڪانفرنس ۽ 2015ع ۾ وفاقي اردو يونيورسٽي پاران منعقد ڪرايل پھرين لوڪ ادب ڪانفرنس جا اوارڊ، جڏهن ته گورنمينٽ نئشنل ڪاليج ڪراچيءَ پاران سال 2022ع ۾ ايم فل جي مقالي تي شيلڊ ڏني وئي.
لفظ طارق عزيز شيخھيٺين داخلائن ۾ پڻ استعمال ٿيل آھي
داخلا ۾ استعمال ٿيل تاريخون
1971.12.19 عيسوي
اديب ۽ صحافي طارق عزيز شيخ، حيدرآباد ۾ 19 ڊسمبر 1971ع تي نامياري صحافي ۽ اديب شيخ عزيز جي گهر ۾ جنم ورتو.
صحافي - ڀاڱي جون ٻِيون داخلائون
خليل الرحمان ميرعـبـدالمجـيـد عـابـد قاضـي
ڏيپلائي محمد عثمان
دوست علي جيسر
سيد غلام رسول شاهه
آر بي سارنگ
غالب لطيف
ارشاد مستوئي
امان الله چانڊيو سنڌي
ضمير نيازي